البيت، الأسرة، الأب، الأم، الأخ، الأخت، العيلة، الصاحب، الصاحبة، الجار، العم، الخال، الحبيب، الفلوس، الدفا، الستر، الصحة، الضحك، الدموع، القلب، العقل، الروح، الضُعف، القوة، الشجاعه، الكرامة، الشرف … كلمات متفرقة لكنها كيان واحد جوايا، العجز اللي دايما بحس بيه، بيوجعلي قلبي اوي، مش بكون قادرة اتنفس لما الهموم تتراكم فى دماغي تباعًا، ع قد الضحك ع قد الهم !! … ياربنا .. ياللي خلقت كل الدنيا وخلقت الخير والشر وخلقتني، إجعل لقلبي نصيب من الخير وإجعل لحياتي ولوجودي سبب في إن خيرك ونورك يغير ناس كتير ويطلعهم من ضلمة قلوبهم لنور حقك.. ياربنا خفف همومي وساعدني في حلها، وخليني دايما معاك وفي طريقك، ياربنا انا الاء ..الاء اللي ذكرتها فى كتابك الكريم، ياربنا تعبانه، هوّن عليا أرجوك ..

اليوم خلص انا هنام دلوقت ان شاء الله الساعه 1:43 AM حليت امتحانات كتير واتلغبطت ف حجات كتير بس الحمدلله مجمعة إلى حد ما، المشكله ان اخطائي مش جهل على قد ما هي لخبطة ف الاشارات والحساباات !!

مكدبش اني متوتره لكن متأكدة ان ربنا مش هيضيعنا واني هحل كويس جدا ف الاستراكشر وهجيب فيها تقدير كمان .. ان شاء الله انا واثقة .. تصبح ع خير انا بحبك اوووي، خليك معايا ارجوووك يارب

صحيت الساعه 6 والساعه دلوقت 18:6 Am بفكر اركب باص 7 !!

ركبت باص 7 فعلا الدنيا كانت بتمطر بغزارة، والحمدلله وصلت للكلية وامتحنت، متوفقتش خالص ف امتحان انهارده.. أملي الوحيد ف ربنا وانه رب المعجزات بجد .. جيت من الكلية متحطمة بكل ما تحمله الكلمه من معنى ونمت وصحيت ع البوست ده من دكتور الميكا اللي هي الماده اللي عليها الدور ف الامتحانات … مبقتش عايزة اذاكر ولا اعمل اي حاجه ف حياتي بجد، انا في حاله لا يُرثى لها اطلاقا .. ف نفس الوقت لاقيت زين كلمني يسألني عملت اييه انا بحبه بحبه بحبه جدا، إزاي السما تجعل شخص بالشكل ده صديق وأخ ليا بس !! يارب هو انا استاهل فعلا !! هوّن عليا كتير اوي، هو بيكون قادر ينتشلني من كل اللخطبه والتوهه اللي ببقى فيهم، بكلمات بسيطة لكن معانيها جوايا كبيرة جدا … الحمدلله ، الجدير بالذكر اني فتحت الفيسبوك انهارده ابص باصه يعني فلاقيت طالعلي ف الميموري ان انهارده ذكري حلاقاني لشعري !! وان كنت كاتبه ان المتعه الحقيقة بتكون ف الرحلة بتاعتنا مش ف النجاح او الفشل .. مبقتش فاهمه .. مبقتش عارفه أفهم !! الساعه دلوقت 2:13AM لسه مفتحتش الماده وقاعدة بتفرج ع التليفزيون مليانه إحباط وعدم رغبة ف أي شيء

انتهت ..

محشورة ف الاستراكتشر، ربنا يستر دلوقت الساعع 3:56 AM عندي شعور بإني عايزة أعيط وانهار من العياط غريب، لكنني متماسكة … او لا مش هفضل متماسكة انا هقوم اصلى واتكلم مع ربنا شوية ..

صحيت انهارده الساعه 3ونص العصر.. صليت وأكلت والوقت قعد يعدي ودلوقت انا ف الحمام اهو والعشا بتُصلى بره .. هتوضا وهبدأ اذاكر ان شاء الله .. يارب

خلاص كده ذاكرت شويه كويسين ف الماده والحمدلله رب العالمين ماشي الحال، بس لسه باقى الصعب يااا رب يسر عليا ياارب، واة انا دلوقت الساعه 6:50 AM، صليت الفجر وهناام ان شاء الله .. يارب مصحاش العصر يارب زي انهارده واصحى كمات شويه واكمل يااارب

صحيت من النوم وركبت باص 7ونص واهو دلوقت ف الكليه، قاعده لوحدي يعني بس مش مهم … المشكله اني قاعده ع بنش متلج 😂😂💔 الشوارع ف الكلية كالآتي : بنت وولد قاعدين البنت بتذاكرله حاجه او العكس، او بنتين اصحاب قاعدين واحده بتقول للتانيه الزتونه عشان تعرف تحل نوع معين من المسائل.. شله ولاد واقفين يهزروا وكركركر ولدين قاعدين فى ايديهم ورق لكنهم مش بيذاكروا ولا حاجه عمالين يرغوا ده غير العمال بقا اللي لسه جايين وووو وانا ..

الساعه 1:46 PM نايمه في السرير بعد ما صليت اهو، الحمدلله حليت كويس ف الامتحان، ألف حمد وشكر لربنا الحمدلله … هنام وان شاء الله اصحى اشوف الاستراكتشر بقا ، بس بجد ربنا فضله كان مغرقني انهارده، الحمدلله يارب

صحيت صليت وقعدت اتفرج ع المسلسل وبعدين استحميت وصليت قيام وقريت سوره الكهف وصليت الفجر وركعتيه اللي خير من الدنيا وما فيها ورجعت نمت تاني

سلام عليكم:)

كده احنا دخلنا يوم الاربع، يلا ندخل برجلينا اليمين هههههه .. لسه باقيلى جزء الخرايط لكن ذاكرت مسأله شامله حجات كتير مع دكتور سامي .. بفكر اذاكر الخرايط ناو ومنامش غير لما اخلصها،، هقدر ؟ هنشوف !!

7:33 AM هنام دلوقت، هو اة مذاكرتش الخرايط لكن كنت بذاكر وده كويس

صحيت من النوم الساعه 2 ونص صليت الضهر والعصر وقعدت آكل واتصفح النت وقاعدة ناو بذاكر ف الخرايط، او بمعنى اصح قاعده بقراها يعني

“الحمدلله على كل النعم اللي أنعم عليا بيها من غير حول لي ولا قوة ”

الساعه 8:45 pm خلااااصت الخراااايط يااابشششرررر … هو صحيح كروتها بس يعني ماشي الحال الحمدلله.. بآكل برتقال دلوقت وهقعد بقا اشوف محاضرة الدوك اكملها

الساعه 12:55 AM .. خلاص انا ع السرير هنام ان شاء الله، خلصت الحمدلله رب العالمين … مش عارفه الامتحان هيجي عامل ازاى بكره ولا عارفه هعرف احل كويس ولا لا، بس كل الحجات دي علمها عند ربنا وانا بثق فيه :)، ومهما حصل بكره انا راضية وبحبه، اصلا دي حاجه بحبها.. ان مهما اللي قدامي عمل معايا لو انا بحبه بفضل. احبه برضه ومش بزعل ابدا، وربنا تعالى جل شأنه طبعا عمري ما بسخط ع تدابيره ابدا ودايما قلبي بيحبه وراضي به رب ❤

شكرا ياربنا ع كل حاجه انا بحبك اوووووووي،

انتهي :”)

سلام عليكم 🙂

انهارده يوم الثلاثاء، عندي امتحان مساحه يوم الخميس، خلصت لكن باقيللي جزء الخرايط، صحيت العصر على صوت احمد وكلامه المقرف عن بابا وانه خسره كأب وبلابلابلااا، اتوضيت وصليت وقعدت بقا اتفرج على قيامه ارطغرل وآكل وبعدين المغرب والعشا اذنوا معرفش ازاي وصليتهم وبدأت اقفل المسلسل العشا اصلا، وبعدين بدأت اذاكر وكلمت زين طوييلا، كان واحشني والله الولد ده 💙، وبعدين سهرانه اهوو

صحيت الساعه 1 صليت وكان يوم الاتنين فنويت الصيام، وبدأت اذاكر، ويُعتبر ذاكرت الترافيرس الموصل ودلوقت ف شبكه الترافيرسات اهو، عملت كوبايه ينسون بشربها وقاعده بذاكر اهو

عشان بابا انسان جميل، لاقيته جاي دلوقت وجابلي الشكولاته اللي شكلها لطيف اوي دي ❤😍

وعملت اندومي كماان 💃💃

قعدت اتفرج على مسلسل نهاية ارطغرل وننت الساعه 8 الصبح -_-

مرحبا من جديد

انا كويسة ومش هعيط، لالا انا مش كويسة، هو انا انا كويسة أكيد بفضل ربنا عليا لكن حاسه ان حجات كتير معكوكه ع دماغي، والحجات الكتير دي كلها بتتجمع ف الكلية والمذاكرة -_-، انهارده الثلاثاء، امتحاني المفروض انه يوم الاتنين بعد الجاي، يعني بالظبط فاضل 11 يوم، وانا اصلا مش مظبطة ولا ماده وحاسه اني ضيعت فرصه اني ابقى مميزة وناجحه مني، انا عارفه ان مفيش حاجه بتضيع، لكن كل حاجه بتتوقف عليا.. عليا انا وبس! … المهم المواد اللى عليا هي ( ماتريال، فورترن، استراكتشر، ميكانيكا، مساحة، رسم) .. الماتريال ضايعه فيها وكنت جايبه فى الميد بتاعها 35/100 :)، ان شاء الله بفكر أحضر فيها مراجعه عباره عن 5 ايام هتلم المنهج وب 300 جنية -_- “رخيصه اوي”، واتمنى انها تتظبط معايا يااارب، اما الميكانيكا فالدكتور مش طايق الدفعه وعايز يسقطها 🙂 وانا اساسا مش فاهمه فيها كلمه وضااايعااااه ودي كنت جايبه ف الميد بتاعها 14/20، والرسم الجزء بتاع السلالم والبير والارشات بتلغبط فيه، لكن الجزء الجديد الحمدلله ماشي حاله، وجبت ف الميد بتاعها 35.5/45 ،والاستراكتشر انا بحل الشيتات بمجهودي والله وبيطلع عيني فيها وبذاكرها اعمال السنه هتبقى فى حدود 17/20، والميد بتاعها جبت 14 /40 :)، انا والله بقول درجاتي دي ومكسوفه من نفسي، حقيقي يعني اللي هو كنت بعمل ايه طول السنة طيب !!! والمساحه نيلت الدنيا فةالعملى بتاعها وعندي الشفوي بتاعها بكره ربنا يستر مفتختهاش، بس لأجل الحق كنت ذاكرتها قبل كده كويس يعني فربنا يستر على اي حال، فاضل الفورترن غالبا جبت 1،2/5 فى العملى بتاعه ولسه نتيجه الميد مطلعتش وربنا يستر، كل اللي بتمناه من ربنا اني أعدي الترم ده على خير، هو انا مش عارفع اقوله يكرمني الترم ده واتجدعن الترم التاني لاني مش عارفه هعمل ايه، لكن هقوله انه يكرمني الترم ده بكرمه الواسع ويقويني الترم التاني واجيب درجات حلوة وافهم كويس وابقى شطورة وناجحه ولو اني مكنتش أهل لطلبي ده فإن رحمته اللي وسعت كل شيء أهل له :”)

سلام عليكم …

حاليا الساعة 1:35 صباحا .. اللي هو بليل يعني، مفيش سبب معين لكتابتي غير اني عايزة اتكلم شوية فى اى عباطة وخلاص، بسمع موسيقي هادية وبديعة زين كان باعتهالي، وعاملة قهوة، وقاعدة فى الصالة ومطفية النور، كل اللي فى البيت نايمين معادا انا -اصلا لسه صاحية من النوم 🙆-… المهم اني قافلة الفيس والاسك من امبارح، بعد م انهارده عدى من غير فيسبوك ولاقيت انه اهو الموضوع عادي ومشى الحال من غيره، اماااال ليه بقى كنت بضيع عليه وقت كتير جدا بالشكل ده !! ده اللي هو اساس انى لسه عارفه ؟!! كل فترة بقفل فيها الفيسبوك بقول نفس الكلام لنفسي، وكالعادة كنت بجاوب على نفسي بإني عشان مهزأة بعمل كده 💁، السؤال دلوقت انا ليييه قافلة الفيس الاسك وكدهو 👀؟ انا قافلاهم عشان انا متلخبطة وتايهه ومش كويسة خالص، عايزة تركيزي عشان افهم وعايزة اتلم على نفسي، انا حرفيا سايحة جوا كل الحجات دي ومش لاقيه نفسي خالص، قريت ان “التوهه ركعة فرض” واني لازم أدي الفرض وانا راضية عشان كده كده هقضيه ، ولعل بعده فرج ونور لا ينتهي .. بس احساس عقيم اوي، انا دايما من وقت للتاني بكون محتاجه أفصل وأبعد عن كل الابلكيشنس، متهيقلي ده بيساعدني أكون انسانه سوية و مدركه من داخل نفسها هي بتعمل ايه وعشان ايه جات هنا، كان المفروض اعمل كده من بدري لكن الضغط اللي حساه دلوقت كان لازم اتعامل معاه كده، الميد قرب وخايفة ومش مرتاحة فى حجات كتير حواليا، انا مش عايزة اتغياااااار، يارب انت عارف اللي جوايا اكتر مني، إرشدني وساعدني ..ارجووك ..

ملعون الاحساس باللخبطة وإحنا مش عارفين إحنا عايزين ايه !!

Listen to Spirited Away by melodic-reflection #np on #SoundCloud